’n Vrou is na bewering Vrydagmiddag omstreeks 14:00 deur ’n man besteel wat homself as ’n profeet voorgedoen het.
Volgens kapt. Mvula Chaka, polisiewoordvoerder, was die vrou op die Bult op pad bank toe, toe ’n onbekende wit man haar genader het om te vra vir rigtingaanwysings.
Sy het vir die man gesê dat sy nie die aanwysings ken nie. Die man het glo daarna vir die vrou gesê dat hy ’n profeet is en dat sy saam met hom na haar huis moet gaan waar hy vir haar sal bid.
Die goedgelowige vrou het die man na haar huis in Malherbestraat geneem, waar hy vir haar gesê het om haar skootrekenaar te gaan haal. Met die skootrekenaar in die kar het hulle weer gery.
Kort nadat hulle weg is by die vrou se huis, het die sogenaamde profeet vir haar gesê om uit die voertuig te klim sodat sy kan bid. Nadat die vrou uit die kar geklim het, het die “profeet” met die vrou se skootrekenaar, selfoon asook die kontant in haar beursie weggery.