‘n 19 Jarige man het vandag (28 Mei) in die landroshof in Vryburg op twee klagtes van moord verskyn.

Volgens Lt. kol. Amanda Funani, polisiewoordvoerder, volg dit nadat Marna Engelbrecht (17) en Sharnelle Hough (16) Saterdag (26 Mei) vermoor is. Beide die meisies se lyke was in die koshuis van Hoërskool Stella gevind.

“Die koshuismatrone het beide meisies in die koshuis gevind. Die 17 jarige het aan die trapreling gehang. Met die polisie se aankoms het hulle die ander meisie met ‘n tou om haar nek in ‘n badkamer gevind,” het Funani gesê.

Volgens Funani, is Zander Bylsma (19) kort na die gru-vonds in hegtenis geneem. Hy is glo ‘n ekskêrel van een van die meisies.

Die saak is uitgestel na 6 Augustus vir verdere ondersoek. Bylsma bly in aanhouding.

Lt. Gen. Baile Motswenyane, provinsiale polisiekommissaris, het polisiebeamptes gelukgewens met die goeie werk wat hulle gedoen het om die beskuldigde so vinnig in hegtenis te neem.

“Namens die departement wil ek my opregte meegevoel aan die gesinne en leerders van Hoërskool Stella oordra. Die dood van hierdie twee leerders is ‘n baie tragiese voorval in ons departement. Ons wens die families sterkte toe en weet dat hulle krag van die Here sal kry om hierdie tragedie te hanteer,” het Sello Lehari, LUR vir onderwys van die Noordwes in ‘n verklaring gesê.