‘n Groep inwoners in Rivierstraat in Wyk 5 sit al sedert Maandagoggend sonder kragtoevoer weens vermoedelike kabeldiefstal.

Volgens ‘n inwoner in die wyk, Altus Snyman, het sekuriteitskameras vasgelê hoe verdagtes vroeg die oggend aan kabels knip.

In die beeldmateriaal kan gesien word hoe vonke spat terwyl die verdagtes na bewering besig is om lewendige elektriese kabels te knip. Dit het omstreeks 04:14 gebeur.

‘n Inwoner in Rivierstraat, wat verkies om anoniem te bly, is raadop oor die gebrek aan krag.

“Hoe gaan ons ons vleis koud hou sonder elektrisiteit?” het sy gesê.

DA-wyksraadslid Heinricha Hodgson sê dat die elektrisiëns eers nuwe kabels benodig het om die kragtoevoer te herstel. Tans (Vrydag, 31 Julie om 16:30) is die werk nog nie voltooi nie.

Die Herald het die JB Marks Munisipaliteit vir kommentaar genader, maar daar was teen publikasietyd nog geen terugvoer nie.