Dit was ’n week van uitnemendheid, trots en merkwaardige prestasies vir Potchefstroom Gimnasium se leerders, met Gimmies wat weer eens bewys het dat hulle nie net in die klaskamer nie, maar ook op nasionale en selfs internasionale vlak hul stempel afdruk.

Model bring glans na die loopplank

Die kollig het helder geskyn op Brené Swanepoel wat tydens die modelbekroning by Snowflake op 11 April as Face of Potchefstroom 2026 – Miss Teen Beginner (1ste prinses) aangewys is. Hierdie besondere prestasie, behaal onder die vaandel van Modelskool JannyDjan Akademie, getuig van haar selfvertroue, deursettingsvermoë en toewyding. Sy dra met trots die Gimmie-naam uit en is ’n inspirasie vir haar medeleerders.

Gimmies wys staal op die viswaters

Op die oop see het Gimmie-leerders hul staal gewys tydens die SADSAA Junior Game Fish Nationals wat van 30 Maart tot 3 April by Sodwana plaasgevind het. Die o.16-span, bestaande uit Conrad Wasserman (kaptein), Christian Smith en Liam Wasserman, het ’n uitstaande algehele eerste plek behaal. Individueel het Conrad eerste geëindig, Liam derde en Christian sesde. ’n Indrukwekkende vertoning van jong talent en vasberadenheid.

Die o.19-span, onder leiding van kaptein Francois Smith, het ook uitstekend gevaar en ’n algehele tweede plek ingepalm, met Francois wat gesamentlik eerste geëindig het. Hierdie prestasies spreek boekdele van die leerders se harde werk, sportmanskap en deursettingsvermoë. Eienskappe wat diep gewortel is in die Gimmie-gees.

Somé se danstalent ken geen perke

Intussen het Somé Cromhout die dansvloer oorheers by die nasionale rondte van Rising to Fame. Sy het eerste plek in Contemporary verower, asook tweede plekke in Lyrical en Jazz. ’n Uitsonderlike prestasie wat haar veelsydigheid en passie vir dans beklemtoon. As kroon op haar sukses is sy uitgenooi na die gesogte Broadway Performance Showcase Experience (BPSE), waar sy die geleentheid gehad het om saam met die wêreldbekende Ferdinand Gernandt te werk tydens die voorbereiding vir die gala-aand.