Gimmies weer die gunsteling by Interhoër

Atletiekliefhebbers se monde sal hierdie Saterdag water wanneer Potchefstroom skole se groot Interhoër-byeenkoms by die Puk McArthur-stadion gaan plaasvind. Atlete van Potchefstroom Gimnasium, Hoër Volkskool Potchefstroom, Potchefstroom Girls High, Potchefstroom Boys High en Hoërskool Lichtenburg gaan aan hierdie spogbyeenkoms, wat Girls High aanbied, deelneem. Hier is waar atlete dit maak of breek op die roesrooi …

February 10, 2017

1 minute read

Potchefstroom Girls High is gereed om komende Saterdag 11 Februarie se Potchefstroom Interhoër Atletiek aan te bied. Hier is die Potchefstroomse skole wat deelneem se atletiekkapteine en hoofleiers. Agter van links na regs is Stanislaw Hohowsky (Volkskool se atletiekkaptein), Paballo Maimane (Potchefstroom Boys High atletiekkaptein) en Roubert Rousseau (hoofseun, Potchefstroom Gimnasium). Voor is Queen Masitsha (visekaptein van Girls High se atletiekspan), Johani Luwes (kaptein van Volkies se atletiekspan), Rizané van Rooyen (hoofdogter, Potchefstroom Gimnasium), Katlego Manana (atletiekkaptein, Potchefstroom Girls High) en me. Eliza Meyer (skoolhoof, Potchefstroom Girls High).

Atletiekliefhebbers se monde sal hierdie Saterdag water wanneer Potchefstroom skole se groot Interhoër-byeenkoms by die Puk McArthur-stadion gaan plaasvind.

Atlete van Potchefstroom Gimnasium, Hoër Volkskool Potchefstroom, Potchefstroom Girls High, Potchefstroom Boys High en Hoërskool Lichtenburg gaan aan hierdie spogbyeenkoms, wat Girls High aanbied, deelneem.

Hier is waar atlete dit maak of breek op die roesrooi tartanbaan of op die grasgroen velde van die historiese atletiekstadion.

Potchefstroom Gimnasium is natuurlik weer uit die staanspoor die gunsteling en die ander skole gaan alles moet insit om te keer dat Gimmies vir die 25ste keer sedert 1991 die beker vat. Dit sal ook dan die elfde keer agtereenvolgend wees as Gimmies Saterdag kan skoonskip maak.

Gimmies atlete om dop te hou sal Karmen Fouché wees wat die SA o.13 kampioen in hoogspring was en ook ‘n kranige baanatleet is. Sy het verlede naweek 1.65 meter gespring en sal goud in haar eerste interhoër wil verower. Verder is Jaco Schoeman en Maritz Pieters ook kookwater in die seuns o.19 100- en 200 meter items. Almero Niemann (o.15) in die werpskyf is ook iemand om dop te hou.

Volkies se trots sal waarskynlik weer by Robbie de Villiers (800 meter en 1500 meter o.17) sowel as Marionique Wentzel, die uitstekende hoogspringatleet (dogters o.17) lê. Cara du Preez (o.16) sal ook in die langafstande haar skool wil trots maak.

Potchefstroom Boys High se kranige hekkiesatleet, Paballo Maimane en langafstand atleet, Gomolemo Mmusi, gaan ook ‘n verskil op die baan wil maak.

Natuurlik sal ‘n interhoër nie dieselfde wees sonder ‘n optog en kleurryke geesvangaktiwiteite nie. Dit is altyd ‘n plesier vir die oog en die oor om hierdie vermaaklikheid op die hoofpawiljoen te aanskou.

Die optog begin om 07:00, met die atletiek wat om 08:15 voortgaan.