Volgens verskeie inwoners van McWilliamstraat in Venterspo, het daar sowat drie maande gelede ‘n varswaterlek op die sypaadjie ontstaan wat almal se lewens verontrief.

“Ek het al telkemale die probleem gerapporteer, maar al wat gebeur is dat hulle uitkom om foto’s te neem. Dan hoor ons niks nie tot ons dit weer rapporteer,” het Chris Brits gesê.

Hy bedryf al vir meer as 20 jaar ‘n snoepwinkel in die straat by sy huis en hy voel dat die water ‘n gesondheidsrisiko vir sy klante inhou.

“Kinders loop hier verby en speel dan in die water. Die water dam op plekke op en dit gaan siektes veroorsaak. Die teer voor my oprit is ook besig om te kraak en daar gaan binnekort groot slaggate vorm,” het hy gesê.

Volgens Constance Tau het dié lek ‘n paar weke voor die verkiesing op 8 Mei begin.

“Ek kan nie eers onthou hoeveel keer ek die lek gerapporteer het nie, want dit is baie. Niks gebeur nie. My watermeter is al drie jaar stukkend, maar ek kry nog elke maand my rekening. Hulle steur hul nie aan enige probleme nie,” het sy gesê.

Lazarus Mmolawa het dié probleem ook al verskeie kere gerapporteer.

“Niemand kan vir mens die nommer gee van die persoon wat vir dié tipe instandhoudingswerk verantwoordelik is nie. Ons kan die waterlek seker self regmaak, maar dis nie ons verantwoordelikheid om die munisipaliteit se werk te doen nie.”