Karen Wingard, 27, skilder en teken al van die ouderdom van 16 af, en haar meesterstukke is briljant.
“Ek het ernstig begin teken en skilder toe ek Kuns en Ontwerp by Hoërskool Randburg geneem het,” het sy gesê.
Karen het vertel dat sy nooit enige lesse geneem het nie, en dat sy glo dat sy met ‘n talent vir die kunste gebore is. Kuns is vir seker haar passie, of dit nou teken of skilder is.
“My gunstelingmediums is pen, en waterverf, wat elke keer ‘n uitdaging is. Ek hou ook daarvan om met potlood te skets, en akrielverf in my werke te gebruik.”
Karen het vertel dat sy haar pensketse en haar waterverfstukke gewoonlik binne een dag voltooi, maar haar potloodsketse neem gewoonlik ‘n bietjie langer omdat daar gewoonlik baie detail daarin is waarop gefokus moet word.
Volgens Karen vind sy haar inspirasie in foto’s waarin ‘n besondere oomblik vasgevang is en ‘n storie vertel, en wat iets spesiaal kan beteken.
Kuns is vir haar baie terapeuties, en sy glo dat dit ‘n mens se bui van sleg na goed kan laat verander. “Wanneer ek my kuns aanpak, voel ek rustig en ontspanne.”
