AfriForum se buurtwag in Randfontein het saam met die buurtwagte van Krugersdorp en Roodepoort op Saterdag, 27 Junie ’n plaaspatrollie gehou om sigbaarheid in die landelike gebiede te verhoog.

Volgens Martin Lombard, voorsitter van dié buurtwag het 78 lede van AfriForum se Krugersdorp-, Roodepoort- en Randfontein-buurtwag asook lede van die Emergency Tactical Medical Group (ETNG), privaat sekuriteitsmaatskappye, ER24 en Netcare aan dié plaaspatrollie deelgeneem.

“Die konvooi van 40 voertuie het tot in Tarlton gery, waarna dit in twee groepe verdeel het. Een van die groepe het ’n oproep oor ’n plaasaanval vanuit die Zwartkrans-omgewing ontvang en die patrolleerders het saam met Conserv Security bystand verleen. Die polisie se honde-eenheid is ook uitgeroep.

“Dankie aan die bestuur van AfriForum se Wes-Rand-takke en aan almal wat deel was van die patrollie. Ek wil graag lede van die gemeenskap aanmoedig om by die veiligheidstrukture betrokke te raak.”