Die 14-jarige Simoné van Vollenhoven het onlangs ‘n baie groot projek vir ‘n goeie doel aangepak.

Sy is ‘n Mej Randfontein 2020-finalis en sy gebruik die platform om beertjies vir kankerpasiënte in te samel vir haar Bear4aBuddy-projek. Haar plan was om vroeër vanjaar dié projek aan te pak, maar sy moes dit weens die grendeltyd uitstel.

Een van my skoolmaats is met kanker gediagnoseer en dit het my laat besef dat kinderkankerpasiënte ‘n moeilike stryd voer. Ek wou graag iets vir hulle doen om hulle aan te moedig om braaf te wees.

“Ek het ‘n bietjie meer uitgevind oor die kankerpasiënte van die Wits Donald Gordon Mediese Sentrum en ek het besef dat hulle nie regtig energie het om te speel wanneer hulle behandeling kry nie. Ek dink toe dat dit ‘n goeie idee sal wees om vir hulle sagte beertjies in te samel,” het sy gesê.

Volgens Simoné hoop sy dat hierdie beertjies die kinders sal laat glimlag en dat dit hulle moed sal gee om teen die siekte te veg. Haar ma se niggie het ’n tydjie gelede haar stryd teen kanker verloor en daarom lê hierdie projek haar baie na aan die hart.

“Ons het al baie beertjies ingesamel, maar enige Randfonteiner is steeds welkom om nog te skenk. Ons sal die beertjies was en ontsmet voordat ons hulle in September vir die kankerpasiënte gaan uitdeel,” het sy bygevoeg.