Wat begin het met ‘n Mandela Dag-sopkombuis, het vinnig verander in ‘n kosprojek vir ‘n groot deel van die gemeenskap van Toekomsrus.

Koekie Alie het vir die afgelope paar jaar op Mandela Dag sop aan die gemeenskap uitgedeel, maar sy het reeds aan die begin van die grendeltyd groot nood in haar gemeenskap gesien.

“Ek en ‘n groepie van vyf ander vroue uit die gemeenskap het groente en vleis bymekaar gemaak, begin kos kook en dit in die gemeenskap uitgedeel. Daarna het ons begin skenkings kry van ander inwoners, kerke en besighede en nou kook ons op Dinsdae en Vrydae,” het sy gesê,

Elke dag se spyskaart lyk anders en die kos word met lekker speserye en baie liefde voorberei. Om 12nm staan die mense tou voor Koekie se huis in Madeliefiestraat om ‘n bakkie warm kos te kry.

Volgens Koekie word die nood elke dag net groter en hulle kry al meer en meer mense wat ‘n bakkie kos kom haal.

Dis meestal bejaardes en kinders, maar ons sien ook jong werkloses wat kom kos haal. Sommige dae gee ons tot 400 mense kos. Ons hoop om meer skenkings te kry sodat ons nog meer mense kan help,” het sy bygevoeg.