Die Connie Mulder Sentrum het onlangs hul jaarlikse kermis aangebied – ’n opwindende geleentheid waar inwoners en personeel saam met die gemeenskap kon kuier en feesvier.

Bestuurshoof van die sentrum, Elona Uys, het verduidelik dat baie van die ouer inwoners nie elke tweede week saam met die bus dorp toe kan gaan nie. Sy het beklemtoon hoe belangrik dit is dat hulle steeds kontak met die gemeenskap behou.

“Die jaarlikse kermis bied juis aan die inwoners en dagwerkers die geleentheid om ’n dag saam met die publiek deur te bring en sosiaal betrokke te wees,” sê Elona.

Sy het bygevoeg dat die inwoners die hele jaar uitsien na hierdie dag.

“Ons laat hulle toe om lekkergoed en kos te koop, en dit is vir hulle ’n groot bederfdag. Deur die jaar maak die inwoners verskeie items in hul werkswinkels, wat dan tydens die kermis verkoop word,” het sy verduidelik.

Elona het ook haar dank uitgespreek teenoor almal wat die dag ondersteun het, en gesê sy glo dit was die grootste sukses nog.

“Sonder julle hulp kan ons nie hierdie funksie aanbied nie. Van die musiek tot almal se harde werk en donasies – baie dankie. Ek wil ook aan ons beheerraad en personeel baie dankie sê vir julle hulp. Ek is trots om saam met julle te kan werk,” het Elona afgesluit.