Strate vol liggies en Kersliedere tref Randfontein
Op 5 Desember sal Randfontein se strate skitter met helder liggies en koorliedere. Ds Edwin van Wyk nooi die gemeenskap uit om hierdie spesiale aand saam te geniet.
Die gewilde Carols by Candlelight-geleentheid maak vanjaar weer sy verskyning, en ’n vragmotor met ’n koor sal deur die dorp ry om die feestyd te vier.
Volgens ds Edwin van Wyk werk verskeie gemeentes elke jaar saam om iets besonder aan die dorp terug te gee. Gedurende hierdie aand sal Kersliedere vanaf die vragmotor gesing word, waarna geskenke by Renaisance, Randpoort Tuiste, Vriendskap Tuiste en aan die publiek uitgedeel word.
Hy het verder verduidelik dat daar jaarliks ’n verdienstelike instansie uit Randfontein gekies word om hul werksaamhede en behoeftes aan die publiek bekend te stel. Hierdie jaar is The Golden Oldies Care Centre for the Aged, wat ouer persone versorg, as een van die instansies gekies.
Die vragmotor vertrek omstreeks 17:00 vanaf NGK Randpoort op 5 Desember.
“Ouers, kinders en motoriste wat in die konvooi wil saamry, moet reeds om 16:45 op die kerkgronde wees,” het Edwin gesê.
Diegene wat nie op die vragmotor ry nie, kan die aand saam met Kerssang en musiek by Tambotie Mall vanaf 18:30 geniet.
Vir meer inligting, kontak Edwin by 082 305 5807 of Stephen by 066 267 6391.
