Om die druk op hul finansies te verlig, het die RandWest Dierebeskermingsvereniging (DBV) onlangs ’n fondsinsameling aangebied nadat ’n plaaslike kroeg in Tarlton hulle genooi het om by hul dagprogram aan te sluit.

Op 22 November het die DBV verskeie stalletjies en ’n waterglybaan aangebied vir inwoners om te geniet. Die bekende sangeres Nadine het dié aand opgetree, terwyl die Springbokke se oorwinning op feestelike wyse saam gevier is.

Waarnemende voorsitter van die DBV, Manché Fourie, het verduidelik dat die vereniging reeds sowat R50 000 per maand aan veeartsrekeninge en petrol bestee. Daarom was hierdie fondsinsameling van groot waarde om die DBV se uitgawes te help dra.

In totaal is R4 300 tydens die geleentheid ingesamel.

“Die hoogtepunt van die dag was beslis toe ons vir Nadine ontmoet het. Sy het self ’n sagte hart vir diere en ondersteun die werk wat ons doen,” het hy gesê.