Die Wes Rand Canopy van die Valskerm Veterane Organisasie (PVO) nooi voormalige valskermsoldate en belangstellendes wat die organisasie wil ondersteun, na sy maandelikse vergadering op Saterdag 24 Oktober.

Volgens die organisasie se sekretaris, Amanda Morris, begin die vergadering om 13:30, met aankoms vanaf 13:00, by die MOTH Shellhole in Wesstraat 2, Krugersdorp.

Die PVO, ook bekend as die Parabat Veterane, is in Februarie 2015 formeel gestig om gekwalifiseerde Suid-Afrikaanse valskermsoldate te verenig en hul geskiedenis, tradisies en kameraadskap te bewaar. Die organisasie is geaffilieer by die Raad vir Militêre Veterane-organisasies (CMVO).

Die geskiedenis van die Parabats dateer terug na 1960, toe 15 vrywilligers van die destydse Suid-Afrikaanse Weermag na Engeland gestuur is vir gevorderde valskermopleiding. In April 1961 het dié instrukteurs, saam met lede van 2 Mobile Watch, die grondslag gelê vir die stigting van 1 Valskermbataljon in Tempe, Bloemfontein.

Benewens die bevordering van kameraadskap tussen voormalige valskermsoldate, ondersteun die PVO veterane en hul gesinne onder meer deur ’n bemagtigingsfonds vir behoeftige veterane. Die organisasie help ook om historiese uitstallings en militêre herinneringe te bewaar.

Die Wes Rand Canopy se maandelikse byeenkomste bied lede en belangstellendes die geleentheid om meer oor die organisasie se werk te leer en die bande van die Airborne Brotherhood lewend te hou.

Vir meer inligting, kontak Morris by 082 254 8387.