JD Opperman, ’n leerder van Laerskool Randfontein, het onlangs die opwindende nuus ontvang dat hy vir die Lions-krieketspan gekies is.

Oor sy prestasie het JD gesê: “Ek is baie bly en opgewonde. Ek glo ek het hard gewerk en ek hoop om nog meer in die toekoms te bereik.”

Hy het verduidelik dat hierdie mylpaal gevolg het nadat hy sy beste tydens die Gauteng-Wes-toernooi gelewer het. JD vertel dat hy reeds op sy derde verjaardag sy eerste krieketkolf en -helm as geskenk ontvang het, en dat hy selfs vóór dié tyd al belangstelling in die sport begin toon het.

“Dit is vir my lekker; ek geniet dit vreeslik en krieket leer jou baie. Ek dink dit is deel van my DNA,” het JD bygevoeg.

Hy deel ook advies aan ander: “Werk hard, gee jou beste en bly altyd nederig. Die belangrikste is om dit te geniet. Glo in jouself en bly positief. As jy hard werk, sal jy die vrugte daarvan pluk.”

JD het ten slotte ook Liewe Jesus bedank vir sy talent.