Laerskool Randfontein se RAM Extreme- en RAM Ignite-groepe het hul laaste jaar in styl afgesluit deur Diamant-toekennings in die RACA Eisteddfod te verower.

Volgens skoolwoordvoerder Annie Nolan was dit die laaste jaar wat die skool dans aangebied het, en die groepe het dit op ’n ware hoogtepunt beëindig.

RAM Extreme – bestaande uit 23 graad vyf tot sewe-leerders – is as D2-wenners aangewys. Hulle het ’n Diamant-toekenning ontvang en eerste plek behaal in RACA, Clash of the Titans en die algehele junior-prestasies.

RAM Ignite – met 21 graad drie tot vier-leerders – het ewe skitterend gevaar. Hulle het ook ’n Diamant-toekenning en D2-wen ingepalm, saam met die RACA Choice of the People-toekenning en eerste plek in Clash of the Titans.

Nolan bedank die afrigters, organiseerders en ouers vir hul steun deur die jaar.