Dis Teine teen Wanderers vir ‘n plek in Pirates Groot Uitdaag-reeks

Randfontein Rugbyklub berei nou al voor vir een van hul grootste kragmetings nog.

Op 2 Maart 2024 sal Teine en Wanderers mekaar die stryd aansê in ‘n promosie-relegasie-wedstryd waar die wenner sal veg vir ‘n plek in die Pirates Groot Uitdaag-reeks.

Die gelukkige wenner sal wel bepaal word na al vyf spanne se uitslae. Die klub aan die verloorkant sal dan ongelukkig moet afskuif na die Senior Groot Uitdaag-reeks.

Vir Teine is ‘n promosie na die Pirates-reeks iets waarvoor hulle juis hard gewerk het die afgelope jare.

Teine het reeds op 2 November vanjaar met hul voorseisoen begin en ook besluit om al hul spelers wat vanjaar diens gedoen het weer vir 2024 te behou.

“Vir die laaste twee jaar het ons eerste span asook die junior spanne hul onderskeie ligas in die Goue Leeus Rugby Unie se Senior Groot Uitdaag-reeks gewen. Vanjaar het die eerste, tweede, derde en junior [o21] spanne almal die liga gewen en geskiedenis gemaak. Ons is nou geregtig tot ‘n promosie-relegasie-wedstryd. Vir volgende jaar se wedstryd sal ons ‘n addisionele o19-span byvoeg en dus sal daar vyf spanne wees wat volgende jaar aan die liga sal deelneem,” het Randfontein Rugbyklub se direkteur van rugby, Hennie van Eck gesê.

Hy het bygevoeg, “Ons het in 2022 teen groot name en klubs gespeel en goeie sukses behaal so ons is slaggereed om te wys wat in ons steek.”