Teine oorwin Witrivier in vriendskaplike wedstryd

Randfontein Rugby Klub het beïndruk toe hulle teen Witrivier Rugby Klub kragte gemeet het in ‘n vriendskaplike wedstryd. Op 20 April het beide Teine se eerste en tweede spanne gewen teen Witrivier.

Teine se eerste span het agt driëe gedruk met vyf doelskoppe. Hulle het weggestap met ‘n telling van 50–19 in Randfontein se guns.

Christo van Emmenis, Bennie Beyleveld, Dewalt Sonnekus, Justin Meintjies, Louis Smit, Brandon Rieck en Jacqone de Villiers het elkeen ‘n drie gedruk terwyl Tiaan Nel een doelskop gekry het. Rudi Marx het een drie gedruk en vier doelskoppe aangeteken.

Teine se tweede span het vyf driëe en vyf doelskoppe gehad en gewen met ‘n 35–17 telling in Randfontein se guns.

Eben Vorster, Lwando Khawuleza en Werner Mclean het elkeen ‘n drie gedruk terwyl Hardus van Aswegen twee driëe gedruk het. Steff Calitz het vyf doelskoppe aangeteken.