Jarelange speler van Randfontein Krieketklub, Jaunrey Zaayman, is vir die derde jaar agtereenvolgens vir die Gauteng Lions gekies.

Jaunrey het vertel dat hy reeds op vyfjarige ouderdom ernstig met krieket begin het. Hy het toe vir Randfontein Krieketklub se o9-span begin speel en op ses vir Laerskool Rapportryer se o9-span. Net drie jaar later het hy reeds vir die eerste span begin speel.

Tans is hy deel van Hoërskool Monument se eerste span en is onlangs ook vir die o15-Lionspan gekies.

“Dis ’n ongelooflike gevoel. Dis iets waarvoor ek hard gewerk het, en ek is baie dankbaar om dit te kon bereik,” sê Jaunrey.

Hy verduidelik dat elke speler deur ’n keuringsproses gaan en dat hy daagliks geoefen het om voor te berei.
“Jy moet elke dag iets doen om beter te word. Dis nie net talent nie; dis toewyding en deursettingsvermoë,” sê hy.

Jaunrey voeg by: “Ek is baie trots om vir die Gauteng Lions gekies te wees. Dis nou my derde jaar in ’n ry wat ek die span maak. Dit wys dat harde werk werklik vrugte afwerp.”

Aan ander jong spelers raai hy: “Glo in jouself en werk elke dag aan jou droom. Niks gebeur oornag nie – jy moet bereid wees om die moeite te doen.”

Hy hoop om aan te hou groei en eendag professioneel te speel.

Volgens klubtesourier Rison Woodcock het die klub se junior span onlangs hul seisoen afgeskop.