‘n Sokkerspeler is waarskynlik in die sop wanneer hy by die huis kom nadat hy sy vrou, sy meisie en sy aanhangers vir hul ondersteuning bedank het.

Een so ‘n speler het die blaps begaan tydens ‘n TV-onderhoud nadat hy as speler van die wedstryd aangewys is. Volgens berigte is die man, ‘n buitelander, lid van die Free State Stars-span wat aan die Suid-Afrikaanse Premierliga deelneem. Tydens die onderhoud het die speler eers vertel hoe hy sy aanhangers waardeer, en bedank dan sy vrou en sommer sy meisie ook. Toe hy egter sy fout besef, het hy gou gesê hy’s jammer. Hy het toe sy vrou se naam asook haar troetelnaam genoem en vertel hoe lief hy haar het.

Of hy dit bedoel het, sal net hy weet. Die punt is dat baie mense nou van sy streke weet. Selfs ‘n Britse koerant het hom gespot deur te skryf …”[Person’s name]scored twice in the game and apparently off the pitch“.

Ek praat dit nie goed nie, ek vertel net wat kan gebeur. Beskou dit gerus ook as ‘n wekroep vir mense wat skelmpies aanhou. Geraamtes in die kas val altyd uit.