‘n Man is Woensdagaand in Haarhoffstraat in Rietfontein verkrag.
Twee ander mans het hom oorval terwyl hy huis toe gestap het, sê Moot-polisiewoordvoerder adjudant-offisier Dave Muller.
Muller sê die slagoffer se selfoon is ook gesteel en Moot se seksuele misdrywe-eenheid ondersoek ‘n saak van verkragting en roof.
Tanya Cassell, ‘n Rietfontein-inwoner, sê haar man Walter en hul tuinwerker Sam Moseki het die verkragters op heterdaad betrap.
“Ons honde het vreeslik geblaf en my man het besluit om ondersoek in te stel. Hy het vir Sam gevra om saam met hom te stap. Hy het die flitslig in die veld oorkant ons huis geskyn en die twee mans opgemerk,” het Cassell gesê.
Een van die mans het van sy hurke af opgestaan en sy broek vasgemaak. “Dié man het vir Walter gesê hy moet homself nie aan hulle steur nie – hulle is besig om seks te hê. Daarna het hulle hul broeke vasgemaak en ongeërg weggeloop.”
By nadere ondersoek het Walter en Moseki die slagoffer in ‘n bos gekry. Die erg geskokte man het verduidelik dat twee mans hom beroof, aangerand en verkrag het.
Die polisie en ambulansdienste is na die toneel ontbied.
Indien jy enige inligting het, stuur ons ‘n epos by editorial@rekord.co.za of skakel 072 435 7717.
Vir jou daaglikse gratis gemeenskapsnuus, besoek Rekord se webwerwe:
Besoek ook ons Facebook en Twitter blaaie.
