Hoërskool Zwartkop se atlete word nie afgeskrik deur ’n rekord nie – selfs nie dié wat al so lank as 20 jaar staan nie.
Gedurende die tuisatletiekbyeenkoms teen hoërskole Noordheuwel en Menlopark op 26 Januarie, het die Zwarrie-atlete gesorg vir ’n paar uitsonderlike rekords.
Gerhard van Rooyen het die seuns o/19 110m hekkies-rekord, wat in 1999 opgestel is, met ’n tyd van 14:99s gebreek, terwyl Cherelee Miles die 2001-rekord vir meisies o/16 400m hekkies met ’n tyd van 1:07:70s verbeter het.
Danica Strydom en Gawie Louw het elkeen sommer twee rekords laat spat vir onderskeidelik meisies o/17 400m hekkies (1:05:06s) asook die 110m hekkies (14:51s) en seuns o/19 400m hekkies (54:90s) en die 400m naellope (49:49s).
Iné Smit het met haar spiesgooi-vernuf ’n rekord van 2015 geskrap met ’n afstand van 42.03m.
Caleb Beukes het ’n 20-jaar-oue 3 000m langafstand-rekord verbeter in ’n ongelooflike tyd van 9:13:60. Hierdie rekord is vanaf 1998 deur M Mans (9:15:60) gehou.
Die o/16 meisiesaflosspan het almal aan die gons gehad toe hulle Hoërskool Noordheuwel se 20-jaar-oue rekord met ’n tyd van 15:90s verbeter het.
Baie geluk aan elke atleet en afrigter – hierdie rekords getuig van harde werk. Met sulke uitslae kan mens nie anders as om uit te sien na die Interhoër nie.
