Jong seun kraai drie keer koning op die sportveld

Vir hierdie talentvolle mannetjie, was dit nog nie die einde nie.

July 25, 2019

Rekord Newspaper 1 minute read

’n Graad 6-leerder van Maragon Olympus, in die ooste van Pretoria, Duardt Tollig, het gedurende die eerste twee kwartale van die jaar reeds provinsiale kleure in drie van sy sportsoorte verkry.

Hy het vir twee agtereenvolgende jare sy Gauteng-kleure in die 100m-naellope vir seuns o.12 verwerf.

Hy het Gauteng ook weer in die naellope by die Suid-Afrikaanse skole-kampioenskap, wat tydens Maart in Germiston gehou is, verteenwoordig. Tydens dié byeenkoms het Duardt se aflosspan ook ’n bronsmedalje vir die provinsie ingepalm.

Vir hierdie talentvolle mannetjie, was dit nog nie die einde nie. Na afloop van die atletiekseisoen het Duardt ook sy provinsiale kleure vir beide rugby en hokkie verwerf.

Hy is tot die Blou Bulle se o.12 A-rugbyspan verkies en het aan die Interprovinsiale Rugbytoernooi, wat 12-15 Junie in Klerksdorp gehou is, deelgeneem. Die Blou Bulle het behoorlik hul staal gewys en as oorwinnaars teen die Griekwas en die Valke weggestap.

Duardt kon tydens die toernooi, as heelagter, twee pragtige drieë vir sy span druk en is, tydens die Blou Bulle se wedstryd teen die Valke, as die speler van die wedstryd verkies. Die Blou Bulle het 33-0 teen die Griekwas gewen het ook as oorwinnaars teen die Valke, met ’n telling van 17-10 uit die stryd getree.

Die Blou Bulle se o.12 A-rugbyspan het in die finaal teen die Limpopo Bulle verloor, maar het steeds algeheel tweede in die o.12 Cravenweek geëindig.

Daarmee saam is Duardt ook tot Gauteng Noord Hokkie se A-span verkies. Hier het hy Northerns tydens hul Interprovinsiale Hokkietoernooi, vanaf 16 tot 20 Junie, in Bethlehem verteenwoordig. Dertien o.12-seunsspanne het tydens die hokkietoernooi teen mekaar te staan gekom. Duardt kon ’n hele paar punte vir sy span aanteken en Northerns A het algeheel derde geëindig en in hul finale wedstryd teen die Suid-Vrystaatspan ’n brons medalje verower.