Hoofstad lewer vier modelwenners op
Vier plaaslike kampioene het in die eindronde van ’n nasionale modelkompetisie belangrike nasionale erkenning en ’n moontlike wegspringplek vir verdere ontwikkeling in die bedryf verdien.
Pretoria het sterk na vore getree tydens The Next Opulent Models South African (OMSA) se eindronde op 20 Augustus, waar vier deelnemers uit die hoofstad nasionale titels verower het.
Deelnemers het in modelwerk, fiksheid, mode en vermaak teen mekaar meegeding.
Die geleentheid het terselfdertyd die organisasie se twaalfde bestaansjaar gevier.
Charl Roux en Elsie Robertson van Pretoria-oos. Foto: Elize Parker
Meer as 200 finaliste het voor ’n gehoor van byna 5 000 mense meegeding tydens die twaalfde aanbieding van die kompetisie se glansaand.
Shepherd Mfakose, Shanaya Salt, Chané Venter en Melissa Meiring het die vier titels vir Pretoria ingepalm.
Mfakose is as Liggaam van die Jaar (manlik) vir die 34–55-ouderdomsgroep aangewys, Salt het die Fiksheidkategorie (vroulik) vir die 17–33-ouderdomsgroep gewen, Venter is as Mev. Opulent gekroon en Meiring het die Handelsmerkambassadeur-kategorie verower.
Vanjaar se tema, ‘Reputasie’ het gefokus op die rol van moed, dissipline en konsekwentheid in die opbou van ’n naam en die nastreef van persoonlike ambisies.
Die vertoning is deur kreatiewe direkteur Willie Venter gelei en as ’n volledige verhoogproduksie aangebied.
Loopplank- en fiksheidsafdelings is met beligting, musiek, choreografie en vinnige oorgange gekombineer.
Die finaliste het ook klere van verskeie Suid-Afrikaanse ontwerpers vertoon. Die verskillende afdelings het deelnemers die geleentheid gegee om nie net hul voorkoms nie, maar ook hul selfvertroue, bewegings en verhoogteenwoordigheid te demonstreer.
Ewan Strydom en Shashi Naidoo was die aanbieders van die aand, terwyl ’n paneel bestaande uit Bongani Fassie, Lady Zamar, Kushie Pietersen, Gareth Cliff, Bryan O’Connor, Yolanda Monyai, advokaat Gerrie Nel en Tuani Domijan die finaliste beoordeel het.
Johan Ungerer, uitvoerende hoof van The Next OMSA-handelsmerk, het gesê die kompetisie gaan oor meer as titels en krone. “Die kompetisie verteenwoordig die gedagte dat doodgewone mense uitsonderlik kan presteer indien hulle die regte platforms kry.”
Die ander nasionale wenners het ’n wye reeks kategorieë verteenwoordig. Carla Berg het die Beeldskone Vars Gesig-kategorie gewen, Clinton Samons het Liggaam van die Jaar (Manlik) in die 17 tot 33-ouderdomsgroep verower en Nadine van Staden het die Kurwes-kategorie gewen.
Pauline Roos het Fiksheid vir Vrouens-kategorie vir die 34 tot 55-ouderdomsgroep gewen, terwyl Eric Penny in die manlike 17 tot 29 fiksheidskategorie verower het. Thabo Mpshe het die Fiksheid vir Mans-kategorie vir die 30 tot 55-ouderdomsgroep gewen.
Jaco Engelbrecht het die Mans Ope-kategorie gewen en Thapelo Tsoai is as Mnr. Opulent gekroon.
In die loopplankafdelings het Mfumo Baloyi en Duney Fourie die onderskeie manlike en vroulike titels gewen. Hulle sal Suid-Afrika vervolgens by Top Model Worldwide in Londen verteenwoordig.
Aan Jason de Jager is die titel Handelsmerk Ambassadeur (Manlik) toegeken.
Die kompetisie se uitslae volg ná maande van voorbereiding. Vir die wenners beteken die titels die begin van ’n nuwe fase waarin verdere blootstelling en geleenthede in die model- en kreatiewe bedryf moontlik kan volg.
Die eindronde het soos Ungerer verduidelik “die organisasie se breër doelwit beklemtoon om nuwe talent ’n verhoog te bied waarop hulle ervaring kan opdoen en hul loopbane kan ontwikkel”.
Het jy dalk meer inligting rakende dié storie?
Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram en TikTok en WhatsApp Channel
