Moot bly een van veiliger omgewings in Pta behalwe toename in seksuele geweld

Die polisieminister het onlangs die nuutste misdaadstatistieke vir Julie tot September 2022 vrygestel, en die Moot-area staan steeds uit as een van die veiliger omgewings om in Pretoria te woon.

Tog was daar ’n toename in seksuele misdrywe en eiendomsverwante misdaad in hierdie area.

Volgens die verslag het die Villieria-polisiestasie minder moordsake aangemeld, maar ’n effense toename in aanranding- en rooftoggevalle.

Die aantal seksuele misdrywe het toegeneem met meer gevalle van verkragting en seksuele aanranding.

Eiendomsverwante misdade het ook ’n toename gesien met meer inbrake wat by beide residensiële en nie-residensiële persele aangemeld is.

Gelukkig blyk daar ’n afname in diefstal van motorvoertuie en motorfietse te wees.

Inwoners kan egter gerus voel om te weet dat misdaad wat as gevolg van polisie-optrede opgespoor is, afgeneem het.

Geweldsmisdaad is aan die toeneem by die Eersterust-polisiestasie, veral gevalle van aanranding met die doel om ernstig te beseer, asook gewone aanranding en gewone roof.

Soortgelyk aan die Villieria-stasie, het die Eersteurst-stasie ’n toename in eiendomsverwante misdade gesien, veral inbrake, diefstal van motorvoertuie en motorfietse en diefstal vanuit ’n motorvoertuig.

Adjunk-offisier van die Villieria-polisiestasie Marinda Austin sê sy is bly oor hoe haar stasie op misdaad reageer, maar is bekommerd oor die toename in misdaad teen kinders en vroue en gesinsgeweld.

“Vrouens en kinders is teikens in ons land en ons moet almal saamwerk om hulle te beskerm,” sê sy.

“Ons moet die stilte oor gesinsgeweld verbreek en mense aanmoedig om hulp te soek.”

Austin moedig diegene wat slagoffers van huishoudelike mishandeling is aan om ’n beskermingsbevel by die polisiestasie aan te vra.

Sy stel die volgende wenke voor om te voorkom dat jy ’n slagoffer word:

Kapings:
– Vermy om alleen in ’n voertuig te wees wanneer jy in die aand ry.
– Moenie stop by kapingsplekke of by enige afgesonderde area nie.
– Moenie rylopers optel nie, veral as jy alleen ry.
– Vermy afleidings soos om op jou foon te wees, drink en bestuur, ens.
– Verhoog versigtigheid by kruisings – wees altyd op die uitkyk vir mense wat om jou motor ronddwaal of vir enige skielike aktiwiteit rondom jou motor.

Huisrooftogte:
– Wees altyd op die uitkyk vir verdagte persone en voertuie.
– Verhoog sekuriteit deur toegangsdeure met veiligheidshekke te pas en diefwering op vensters te installeer.
– Versoek bure om ’n ogie te hou wanneer jy vir ’n lang tydperk weggaan.
– Moenie hekke en deure vir vreemdelinge oopmaak nie.
– Verifieer die besonderhede van enigiemand voordat jy hulle in diens neem en kontroleer die egtheid van ’n kontrakteur voordat jy toegang tot die perseel toelaat.

Besigheidsrooftogte:
– Moenie te veel geld op die besigheidsperseel aanhou nie.
– Wees op die uitkyk vir verdagte kliënte.
– Moenie die winkel tot laat oophou nie.
– Vermy om alleen te wees, veral in die nag.
– Besigheidseienaars moet vir niemand oopmaak nadat die besigheid gesluit is nie.

Austin verduidelik ook dat alkoholmisbruik die hoofoorsaak is van kontakmisdade soos gewone aanranding, aanranding met die opset om ernstig te beseer, verkragting, roof en moord.

Die volgende veiligheidswenke is om kontakmisdade soos roof of aanranding te voorkom:
– Moenie te veel geld saamdra as jy na drinkplekke gaan nie.
– Moenie wapens dra wanneer jy sosiale byeenkomste bywoon nie.
– Moenie ’n drankie deel met iemand wat jy nie ken nie.
– Vermy konfrontasie wanneer jy onder die invloed van alkohol is.
– Moenie jou drankie sonder toesig los nie.

Do you have more information about the story?

Please send us an email to editorial@rekord.co.za or phone us on 083 625 4114.

For free breaking and community news, visit Rekord’s websites: Rekord East

For more news and interesting articles, like Rekord on Facebook, follow us on Twitter or Instagram