Meer as 7000 atlete het opgedaag vir die Spar Irene Lantern 10km wedloop en die terrein was ‘n miernes van bedrywighede om aan almal se behoeftes te voldoen.
Hierdie drie jong dames het besluit om te sorg dat hulle beslis maklik raakgesien sal word terwyl hulle die Spar Irene Lantern wedloop voltooi. Van links is Michelle Watson, Daniela Venier en Lauren Sackett met hul kleurvolle uitrustings.
Die Spar Irene Lantern 10km wedloop, die eerste been van vanjaar se Irene Driemalige Uitdaging, is die afgelope Woensdagaand op die Landbounavorsingsraad se Irene kampus aangebied.
Meer as 7000 atlete het opgedaag vir dié gewilde aandwedloop en die terrein was ‘n miernes van bedrywighede om aan almal se behoeftes te voldoen. Behalwe vir die atlete, was daar ook die ondersteuners en die harde werkers wat gesorg het dat die reëlings vlot verloop en dat daar genoeg verversings is vir almal.
Die wedloop was weer puik georganiseer. Hierdie feit én die feit dat dit in die plaasatmosfeer op die Landbounavorsingsraad se proefplaas aangebied word dra by tot die gewildheid van die wedloop. Dit was die eerste been van die Irene Driemalige Uitdaging, waarvan die tweede been, die Clover Irene Lentewedloop, in Septembermaand sal plaasvind.
Die res van haar familie het almal aan die wedloop deelgeneem, maar Jennifer Quirk het besluit om liewer op die lowergroen grasperk by die wenpaal vir hulle te wag en solank te werk aan ’n Valentynskaartjie vir die gelukkige kêrel op wie sy haar oog het.
Natashia Saayman het ook verkies om eerder op die grasperk langs die wenpaal te ontspan as om self die langpad aan te pak soos die res van haar gesin. Sy het darem haar seun, Ruben, gehad om haar geselskap te hou.
Nog voor die skoot geklap het vir die atlete om weg te spring in die Spar Irene Lantern wedloop, het die harde werkers agter die skerms al begin om die vure aan te steek, sodat die honger atlete iets kon kry om te eet as hulle klaar gehardloop het.
Bert van der Raad en Cecilia Summerfield van die Alpha Centurion atletiekklub het besluit om nie die langpad aan te durf in die Spar Irene Lantern wedloop nie. Hulle het die klub se tent beman en solank die wors vir aandete gebraai, terwyl hul klubmaats op die pad gesweet het.
Die lede van Irene Atletiekklub het nie self aan die wedloop deelgeneem nie, aangesien hulle die harde werk moes doen om die reëlings suksesvol te laat verloop. Hier beman (van links) Divan Labuschagne, Esthi Jordaan en Soné Jordaan een van die waterpunte, wat die nodige lafenis aan atlete moes verskaf.
Die Spar Irene Lantern wedloop het weer meer as 7000 deelnemers gelok en by die wenpaal het tafels vol medaljes vir die suksesvolle atlete gewag.
Vir baie van die atlete wat die Spar Irene Lantern wedloop voltooi het, was hierdie pannekoekstalletjie net die regte plek om ’n bietjie suiker in te neem en die energievlakke te herstel na die kilometers op die langpad.
Wat kan dan nou meer romanties wees as ’n aandwedloop in die landelike omgewing van die Landbounavorsingsraad se Irene kampus, terwyl lanterns die roete verlig.
Nie almal wat aan die Spar Irene Lantern wedloop deelgeneem het was ewe fiks nie, maar stappers kon ook die koel aandlug en plaasatmosfeer van die roete geniet terwyl hulle goeie oefening kry.
Die Spar Irene Lantern wedloop is bekend as ’n sosiale geleentheid vir die hele gesin en verskeie stootwaentjies kon weer langs die roete opgemerk word.
Hierdie drie jong dames het besluit om te sorg dat hulle beslis maklik raakgesien sal word terwyl hulle die Spar Irene Lantern wedloop voltooi. Van links is Michelle Watson, Daniela Venier en Lauren Sackett met hul kleurvolle uitrustings.
Riëtte Landman was een van die fisioterapeute van Xtreme Pro Sport wat atlete met beserings gratis behandel het by vanjaar se Spar Irene Lantern wedloop.
Louis du Preez van die Magnolia klub het besluit om sommer so op die grasperk langs die Spar kafeteria te rus, nadat hy pas 10km op die pad deurgebring het in die Spar Irene Lantern wedloop.
Dít is uiteindelik al waaroor dit vir die atlete gaan nóg ’n medalje vir die versameling word deur een van die beamptes uitgedeel aan ’n atleet wat pas die 5km pretdraf voltooi het.
Vir hierdie twee gesinne was die Spar Irene Lantern wedloop ’n familiepoging en almal het die roete voltooi om hul medaljes te ontvang. Lede van die Overbeeck en Strydom families se ouderdomme wissel tussen 8 en 34.
Henho Kruger was loshande die langste deelnemer aan hierdie jaar se Spar Irene Lantern wedloop. Inderwaarheid is daar bittermin mense in Pretoria wat langer as Kruger is. Hy staan 2.11m in sy sokkies, wat beteken dat hy in die ou taal langer as sewe voet is. Saam met hom is twee vriendinne, Elna van der Walt (links) en Louise du Plessis.
At Caxton, every story is written by humans. We use AI only to perform quality checks - never to generate the news. Happy reading!
Corné van Zyl is a seasoned journalist and currently a senior reporter at Rekord, with a wealth of experience across various media platforms. She began her career after studying journalism at the Tshwane University of Technology (TUT) and first honed her skills at Media24. Corné’s career took her to Beeld, Sondag newspaper, and the South African Press Association (SAPA), where she built a strong foundation in news reporting. In her free time, Corné enjoys spending time with her family outdoors, embracing life and creating lasting memories with her loved ones.
