Die son het gebak, die kos was uit die boonste rake en die vis was boonop nie skaam om die hengelaars se hoeke te vat nie.

Al hierdie faktore het weer van Ramcat se jaarlikse hengelkompetisie vir gestremde persone ’n groot sukses gemaak.

Dié kompetisie, wat jaarliks by die Irene Country Lodge in Centurion aangebied word, groei volgens die hoof organiseerder, Gerard Smal, elke jaar. Dit het ’n paar jaar gelede begin as ’n manier om aan manne wat in die voormalige Suid-Afrikaanse Weermag (SAW) beseer is en in die uitvoer van hul pligte gestremd geraak het, ’n geleentheid te bied om saam te kuier en vir ’n dag lank langs die viswaters bederf te word. Later het dit uitgebrei en Smal en sy mede organiseerders het ook ’n paar rugbyspelers genooi wat weens beserings in dié sport in rolstoele beland het.

Deesdae is alle gestremde persone welkom om die dag saam te kuier en vanjaar het Smal-hulle selfs ’n paar skoliere van die Trans Oranje Skool vir Dowes by die kompetisie verwelkom. Hulle is almal touwys gemaak deur die kampioen hengelaar, Hennie Moller van die Centurion Hengelklub. Moller hou verskeie lynklas wêreldrekords vir die grootste barbers wat ooit uitgetrek is. Hy het die kinders van Trans Oranje touwys gemaak oor die korrekte manier om die viswater te benader. Dit sluit in tegniese aspekte soos hoe om die regte knope te maak, asook raad oor die regte aas en hoe om ’n lyn in die water te gooi.

Die doofstom kinders het hierdie uitstappie terdeë geniet en verskeie van hulle was dit eens dat hulle terug wil kom viswaters toe om hul nuwe vaardigehde te toets.

Volgens Smal is daar deelnemers wat jaarliks terugkom en groot vriendskappe is al oor die afgelope paar jaar gesmee. Daar is ook jaarliks nuwelinge en vanjaar het die weer oor saamgespeel om die dag baie spesiaal te maak.  Met Rekord se besoek was Wilma McDonald die voorloper met die swaarste vis. McDonald, wie se hande gestrem is, moes deur helpers bygestaan word toe sy voor die kamera wou spog met die baber wat sy gevang het.

Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 072 435 7717.