Die bekende rugby-administaratuer van Pretoria, Neels Grobler, wat verlede week oorlede is, sal op Vrydag 12 Mei begrawe word.

’n Roudiens vir Grobler word gehou by die Lewende Woord Gemeente in Wonderboom. Die adres is Lavenderweg 270 (hoek van Lavenderweg en Zambezi rylaan). Die diens sal om 14:00 begin.

Grobler was wyd bekend in rugbykringe in Pretoria. Hy was voorheen betrokke by TuksRugby, waar hy tussen 2001 en 2015 een van die stigters van die universiteit se rugby-akademie was.

Die afgelope twee jaar was Grobler die Hoof Uitvoerende Beampte van die Internasionale Rugby Instituut, wat gesetel is by die Naka Bulle Rugbyklub.

Grobler (48) is sowat ’n week voor sy dood in die Steve Biko hospitaal opgeneem ná komplikasies weens ’n abses in sy lies, wat vererger is deur ’n aggressiewe bakterie. Ná verskeie operasies het sy algehele gesondheid verder versleg. Nierstuipe is daarna gediagnoseer en Grobler is ’n paar dae later oorlede.

Grobler het ’n reuse nalatenskap in Suid-Afrikaanse rugby. Verskeie internasionale- en SuperRugby spelers, wat andersins nie kon deurbreek na die professionele arena nie, is met sy toedoen ’n kans gegee, waarna hulle suksesvolle loopbane gebou het.

Hy word oorleef deur sy vrou, Magda, en vier kinders.

Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 072 435 7717.

Vir jou daaglikse gratis gemeenskapsnuus, besoek Rekord se webwerwe: