Garsies wen Stadsbeker
Garsfontein het Menlopark die afgelope naweek geklop om weer die stadsbeker vir Makro Skole (Afdeling A) in te palm.
Die Hoërskool Garsfontein se eerste rugbyspan het Saterdag wéér die Stadsbeker in die A-afdeling vir Makroskole gewen deur Hoërskool Menlopark behoorlik met 66-21 te klop.
Dit was waarskynlik Garsfontein se beste vertoning tot dusver vanjaar en hulle het daarmee gewys dat hulle besig is om stoom op te bou om hul titel as VirSeker Beker kampioen in die Makro-skole afdeling suksesvol te verdedig.
Die A-afdeling vir Makro skole in Pretoria is vanjaar wel effens bisar, aangesien net drie skole deel is van hierdie liga. Omdat Waterkloof weier om teen Garsfontein te speel en daarmee punte verbeur, is Garsfontein dus die Stadsbeker kampioen na slegs een wedstryd. Hierdie situasie sal hopelik volgende jaar aangespreek word deur die organiseerders van die VirSeker Beker.
Menlopark het Saterdag se wedstryd aanvanklik teen ’n hoë tempo begin en hulle was duidelik gemotiveer om Garsfontein te onttroon. Teen rustyd het die Garsies egter reeds die oorhand begin kry en hulle het met 24-14 voorgeloop.
Na rustyd was dit hoofsaaklik eenrigtingverkeer toe die Bere van Garsfontein hul snelrat gevind het. Met binesenter Wesley Thompson aan die voorpunt het Garsfontein die drieë ingeryg en hulle het uiteindelik nege keer agter die doellyn gaan kuier.
* Intussen het Waterkloof pakslae gekry in hul vriendskaplike wedstryd teen Helpmekaar van Johannesburg. Heplmekaar het sewe drieë ingeryg in hul oorwinning van 45-8. Hoewel Waterkloof tot dusver vanjaar puik rugby gespeel het, is hulle oorskadu deur die Johannesburgers en hulle kon slegs een keer die doellyn oorsteek.
* Die Wilgers het die afgelope naweek ook weer hul goeie vertonings tot dusver vanjaar voortgesit met ’n puik oorwinning van 37-20 oor Pretoria-Noord. Die Wilgers het vyf drieë gedruk. Hoewel dit ’n oortuigende oorwinning was, moes die Wit Haaie van Die Wilgers hard veg om die manne uit die noorde te troef.
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 072 435 7717.
Vir jou daaglikse gratis gemeenskapsnuus, besoek Rekord se webwerwe:
