Afrikaanse Hoër Meisieskool Pretoria (AHMP) het onlangs ’n unieke ‘Fast 5’ netbaltoernooi  vir laerskool spelers aangebied.

Netbalspelers van elf top laerskole in Pretoria, asook Laerskool Randhart in Johannesburg, was deel van die aksie.

Sover bekend was dit die eerste keer dat laerskool netbalspelers blootgestel is aan hierdie gewilde formaat van die spel.

Dié opwindende formaat van netbal groei tans wêreldwys in gewildheid. Wedstryde in dié formaat is korter as in gewone netbal, terwyl spanne slegs met vyf spelers elk deelneem.  In teenstelling met gewone netbal mag afrigters in die ‘Fast 5’ formaat ook instruksies aan hul spanne gee van die kantlyn af, terwyl onbeperkte plaasvervangers gedurdende wedstryde gebruik kan word.

Doelskieters kan in hierdie formaat ook meer punte vir hul span aanteken as hulle daarin kan slaag om doele van buite die aangewese doelgebied te skiet.

Kenners was dit eens dat uitstaande netbaltalent by die toernooi in aksie gesien is. Die laerskoolmeisies het gou aan die nuwe reëls gewoond geraak en die uitdaging om doele te skiet van buite die gewone doelgebied het hulle ook nie geïntimideer nie.

Uiteindelik is Laerskool Menlopark se span as wenners van die toernooi aangewys. Hulle het Randhart in die eindstryd met 15-12 geklop. Verskeie individuele toekennings is ook gemaak. Carla du Plessis van Menlopark is as die beste speler by die toernooi aangewys.

Vir jou daaglikse gratis gemeenskapsnuus, besoek Rekord se webwerwe: