Toutrek is bekend as een van die mees uitdagende sportsoorte ten opsigte van tegniek, asook die fiksheidsvereistes vir deelnemers.

Hoewel toutrek vir dekades reeds nie meer as Olimpiese sport gereken word nie, is dit steeds baie gewild onder alle kulture oor die wêreld en in sommige lande is dit eeue lank al deel van kulturele feesdae. Dit word ook steeds op georganiseerde wyse as amptelike sportsoort beoefen en Suid-Afrika is bevoorreg om vanjaar die wêreldkampioenskap aan te bied.

Dié sport is gesond in Pretoria, soos die prestasies van die Gauteng-Noord toutrek span by die onlangse nasionale kampioenskap getuig.

Gauteng-Noord Toutrek kon ná die kampioenskap spog met silwer medaljes in beide die 560kg en 640kg afdelings.

Sewe lede van die Gauteng-Noord span het die nasionale keurders ook beïndruk en dié manne is gekies om Suid-Afrika te verteenwoordig by die wêreldkampioenskap, wat van 19 tot 22 September in Kaapstad sal plaasvind.

Vyf lede van die Gauteng-Noord span is gekies in die nasionale Protea span, terwyl twee van die jonger spanlede gekies is om as deel van die Suid-Afrikaanse Gazelle ook aan die ope-afdeling by die wêreldkampioenskap deel te neem.

Gauteng-Noord Toutrek is gesetel by Toutrekpark in 14de laan, tussen Nico Smith- en Frederikastrate in Rietfontein. Belangstellendes kan Oosie Oostuizen skakel by 083-675-1366 vir meer besonderhede.

Vir jou daaglikse gratis gemeenskapsnuus, besoek Rekord se webwerwe: