Hoërskool Garsfontein se seuns-hokkie eerstespan het onlangs dié skool se oorheersing van dié sport in Pretoria bevestig, toe hulle die Pretoria Cup vir die vierde jaar agtereenvolgens gewen het.

Wat hierdie prestasie nog meer uniek en merkwaardig maak is die feit dat die Garsies inderwaarheid teen hulself moes speel om die kampioen te word.

Garsfontein se tweedespan het ook aan hierdie liga deelgeneem en in die proses met twee ander skole se eerstespanne afgereken om vir die eindstryd te kwalifiseer. Toe hul eerstespan óók vir die eindstryd kwalifiseer, moes dié twee spanne dus sake uitspook om die Pretoria Cup kampioen te bepaal.

Hierdie merkwaardige prestasie vir Garsfontein se seuns-hokkiespanne is ’n goeie getuienis vir die harde werk van die skool se hokkie-direkteur, Steven Paulo, en die senior afrigter, Declan Brunnette.

Hulle albei glo ook dat dié prestasie selfs groter kameraderie onder die skool se hokkiespelers gebring het, hoewel hulle teen mekaar moes speel in ’n liga-eindstryd.

Hoewel dit eindstryd opwindend en baie taai was, het die eerstespan uiteindelik as wenners uit die stryd getree om as kampioen gekroon te word.

Het jy dalk meer inligting rakende dié storie? Stuur gerus vir ons ‘n epos na bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.