André Fourie begin met chemo-sessies
André is net meer as drie weke gelede met 'n gewas op die brein gediagnoseer waarna hy na 'n sjirurg in Pretoria is om die gewas te verwyder.
POLOKWANE – André Fourie hou sy vriende, familie en kennisse op hoogte van sy gesondheid, deur sy daaglikse video op sosiale media platform TikTok.
Hy is net meer as drie weke gelede met ‘n gewas op die brein gediagnoseer waarna hy na ‘n sjirurg in Pretoria is om die gewas te verwyder.
Sy herstel was goed en hy is na net vier dae ontslaan.
Op 30 April, slegs twee weke na die operasie het hy ‘n afspraak by die hematoloog gehad wat bevind het die kanker het in die limfkliere ontstaan en na die brein versprei waar die gewas toe aggressief gegroei het.
“Aangesien die drukking van die gewas op my brein verlig is, het my toestand dadelik verbeter.”
Daar is besluit dat André met aggressiewe chemoterapiebehandeling moet begin.
Sodra die kanker in remissie is, kan hulle ‘n beenmurgoorplanting doen. Volgens die dokter is die behandeling baie gespesialiseerd en dus is ‘n staatshospitaal nie ‘n opsie nie.
Terwyl André sy eerste sakkies met chemoterapie ontvang, bly hy in die hospitaal en kry moed vanuit boodskappe wat vriende vir hom stuur.
“Hierdie is ‘n hobbelrige rit, maar dit gaan die moeite werd wees. Die chemo hou my vir ‘n paar dae in die hospitaal en dan kan ek vir so drie weke huis toe gaan. Tans hanteer my liggaam die behandeling goed. Dit kan toegeskryf word aan die feit dat my gestel sterk is. Ons as familie bedank almal vir hulle gebede, boodskappe en ondersteuning.”
Ten tyde van sy laaste video was hy hoopvol om huis toe te gaan waar sy twee dogters vir hom wag.
