Oosskool verras hoof op sy verjaardag

Gideon Pelzer, hoof van Laerskool Pietersburg-Oos is Vrydag met se 42ste verjaardag aangenaam verras toe personeel en leerders vir hom ‘n partytjie op die sportterrein gehou het.
Hy het ‘n verskeidenheid geskenke, insluitend ‘n polshorlosie, ketelbraaier en handgeskrewe briewe van gelukwensing van die leerders ontvang. Hy en sy vrou, Ingrid, het ook aan ‘n spesiale motorfietsrit op die terrein deelgeneem wat deur ‘n plaaslike motoffiets­klub en die skool gereël is.
Michelle van der Westhuizen, leerkrag sê die besluit om Pelzer te bederf is geneem omdat hy so baie vir die skool en leerders beteken. “Ons kon skaars aan ‘n beter manier dink om hom vir sy harde werk en toewyding te bedank. Leerders het ook met oorgawe vir hom briefies met gelukwense geskryf en te sê hoekom hulle dink dat hy ‘n goeie hoof is,” sê sy.
Die spesiale gebaar het Pelzer oorweldig en hy het sy dank teenoor elkeen wat aan die reëlings en vieringe meegedoen het uitgespreek. “Dit was onverwags, baie spesiaal en hartverwarmend.”
Hy het gesê as hy homself iets kan toewens vir sy verjaardag sal dit goeie gesondheid en uitstekende resultate vir die skool wees.

Storie en foto’s: Herbert Rachuene
>>herbert.observer@gmail.com