POLOKWANE – Vir dae aaneen sien hulle al uit na die bergfiets pretdag wat deur die skool gehou is. Uiteindelik lui die klok en kan hulle na die sportvelde beweeg, waar daar ‘n renbaan uiteengesit is, asook ‘n hindernisbaan.
Elke fietsryer moes eers ‘n ronde of twee met hul fietse om die renbaan ry, voordat hulle die hindernisbaan kon aandurf. Hier en daar was ‘n Osie onseker oor die hindernis wat hom in die gesig staar, maar met die hulp van die vriendelike ooms en tannie van Bicycle Company, het hulle almal gemaklik oor die hindernisse gery.
Anja de Nysschen, organiseerder van die bergfiets pretdag by Oosskool, vertel dié aktiwiteite is spesiaal gereël om blootstelling aan dié sport te bied.
“Dit is nog ‘n redelike jong sport by Oosskool en ons plan was om bietjie bewusmaking, nie net van die sport nie, maar ook van die skool te bied. Ons het ook on ligaspan bekend gestel. Kinders het nie meer die geleentheid om vrylik fiets te ry nie en dus wou ons aan hulle hierdie ervaring gee. Die sport gaan nie oor wen of verloor nie, maar oor deelname. Elke fietsryer bring punte in vir die skool.”
