Johan Marx is Curro Heuwelkruin se nuwe hoof
Johan sien uit na die uitdagings en vooruitsigte van die nuwe pos waarin hy hom gaan bevind, en beskou dit as 'n voorreg, het hy afgesluit.
POLOKWANE – Vanaf die derde kwartaal vanjaar spog Curro Heuwelkruin met ‘n ou gesig in ‘n nuwe pos.
Na sy aanvanklike onderwyserjare is Johan Marx onlangs bevorder tot kampushoof van die NVC-afdeling en gaan hy in die hoërskoolhoofstoel inskuif, vanwaar hy sy passie vir die onderwys verder gaan uitleef.
Hy het sy hoërskoolloopbaan aan Hoërskool Pietersburg voltooi en daarna by die Universiteit van Noordwes se Potchefstroomkampus aangesluit.
Marx is ‘n gewilde leerkrag wie se klasse as lig, maar doeltreffend beskryf word.
“Ek het aanvanklik ‘n pos by Laerskool Ivypark aanvaar en deeltyds studeer om my onderwysgraad te voltooi. Die Here het dit op my hart gesit dat ek die onderwys moet betree, en ek geniet steeds elke oomblik daarvan.”
Alhoewel hy oorspronklik wiskunde en wetenskap vir leerders in die intermediêre en senior fases wou aanbied, het hy later besef hy werklik gemakliker met senior leerders in die VOO-fase.
“Die eerste dag wat ek moes klasgee was nogal moeilik. Jy stap in die onbekende in en weet nie wat gaan vir wat nie. Dit is anders as jy jonk is en jou voete moet vind.”
Teen 2012 het Johan besluit om sy vlerke te sprei en aanvaar hy ‘n pos by Curro Heuwelkruin waar hy in 2013 begin skoolhou vir bykans 10 jaar, voordat die onlangse aanstelling vir hom realiseer.
“Skoolhou is vir my lekker, maar toe die geleentheid om hoof van die hoërskool te word oor my pad gekom het, het ek dit met albei hande aangegryp.”
Marx sê hy vind die interaksie met leerders en die diversiteit van verskillende mense stimulerend.
“Elke dag bied nuwe uitdagings. Dit is ook lekker om te sien hoe kinders en hulle belangstellings verander. Om klas te gee verander ook deurentyd. Die tegnieke wat jy moet gebruik om die leerders se aandag te hou verander. Tegnologie speel ‘n groot rol in vandag se manier van klas gee. Daar is ook meer om vir kinders te bied en ons probeer om die leerders te bemagtig.”
Hy sien uit na die uitdagings en vooruitsigte van die nuwe pos waarin hy hom gaan bevind, en beskou dit as ‘n voorreg, het hy afgesluit.
