Kom deel plaaslik in ATKV se hekelmarathon
Sowat 18 vroue van Polokwane het reeds aangedui dat hulle ook gaan saamhekel, terwyl ‘n virtuele platform landwyd vir die geleentheid geskep gaan word.
POLOKWANE – Die ATKV se landswye Hekel 30-ure Safari vind op die laaste naweek van Mei plaas.
Die ATKV-tak Arendsnes in Roodepoort beplan ‘n 30-ure hekelmarathon. Lesers word genooi om saam te hekel.
Angelique Bekker, een van Polokwane se gereelde hekelaars, het van die projek op sosiale media gelees en besluit om deel te word. Sy het begin om vir ander van die Safari te vertel en tans is daar reeds 18 vroue wat gaan saam hekel.
Die doel van hierdie prettige projek is om die Maak-‘n-Verskil hekelgroep te help om komberse te maak wat uitgegee kan word.
Komberse gaan deur Maak ‘n Verskil reg oor die land versprei word.
Die pret begin om 12:00 op 26 Mei en duur tot 18:00 op 27 Mei. In Polokwane kan lesers by Aladdin’s Den Pre-School in Betzstraat bymekaarkom.
Daar sal ook ‘n regstreekse kanaal geskep word waar diegene wat nie by Aladdin’s Den kan uitkom nie, saam met die land kan hekel.
Skenkings van kontant, dubbeldraadwol en nommer vier hekelpenne is welkom en sou jy nie kan saam hekel nie, kan jy by die huis die blokkies van 20cmx20cm hekel en net aflewer. Die afleweringspunt is by Yarnaholix in Marshallstraat.
Die blokkies sal dan vasgewerk word aan mekaar en sodoende ‘n sekere grote kombers vorm, afhangende hoeveel blokkies gebruik word.
Vir meer inligting of om deel te wees van die pret, kontak vir Angelique Bekker by 07 76 879 3326.
