POLOKWANE – Een van die mooiste klanke op ‘n skoolveld, is wanneer die leerders soos een man hulle gunstelingspan aanmoedig. Tweede op die lys is wanneer ‘n goeie musikant, met goeie klank- en ligtoerusting, op die verhoog staan en die gehoor vermaak.

Dit is dan ook juis wat Saterdagaand by die Rooivink Fees gebeur het. Riaan Benadé, Pieter Smith en Fanus Pienaar het saamgespan om die gehoor vir meer as twee ure op hulle voete te hê.

Dit was die tweede Rooivink Fees wat deur Akademie Reformia aangebied is. Hierdie jaarlikse instelling is gewild onder oud en jonk, aangesien dit ‘n familiekuier soos min is.

Met warm drankies in die mandjie, ‘n kampstoel en kombers, staan die koue nie ‘n kans teen die musiek nie.

Fanus het die aand afgeskop met ‘n paar van sy oorspronklike liedjies, insluitend Rigting Na Jou Hart en Luister Na Jou Hart. Nadat die gehoor goed opgewarm is, het Riaan Benadé die gehoor vermaak met sy bekende ballades.

Pieter Smith se Stukkie van der Merwe het verseker dat oud en jonk van hulle laaste oortollige energie ontslae raak.

Mariska Slabber, beheerliggaamlid vir bemarking, sê die aand was ‘n groot sukses.

“Ons kry baie goeie terugvoer en sien uit daarna om volgende jaar groter en beter te gaan. Ek wil almal bedank wat gehelp het om die aand so suksesvol te maak.”