POLOKWANE – “Ek kan nie, ek kan nie, ek kan nie.”

Só gesels Marie Wright met trane in haar oë, soos sy haarself probeer moed inpraat om nie tou op te gee in die proses om haar broer, Buks Booyzen (57) na Polokwane te bring nie.

Marie is Buks se suster en het hom sedert babatyd versorg.

“Ek is die oudste van ses kinders en Buks is die jongste. Al ons ander broers en susters, en ons ouers is al oorlede. Ons het net mekaar oor.”

Buks woon tans in Gqeberha maar is sieklik en dit is daarom dat sy besluit het dit sou beter wees as hy na Polokwane verhuis.

“Hy woon in ‘n enkelkamer en het nie baie besittings nie. Hy sukkel met sy rug en om te loop, aangesien sy voete skeef gedraai het en geen gevoel het nie. Hy het ook probleme met sy linkerhand.”

Marie is bekommerd aangesien daar niemand is om na Buks om te sien nie.

“In Januarie was Buks by die ortopeet en dié het gehelp om hom by die regte mediese personeel uit te kry vir bloedtoetse en ‘n MRI-skandering.

Die dokter het vir hom gesê hy het ‘n kwaadaardige gewas en hy het in Maart met sy eerste chemobehandeling begin.”

Net voordat hy sy tweede ronde chemoterapiebehandeling kon ondergaan is Buks in die hospitaal opgeneem nadat hy erge pyn in sy bors begin ervaar het.

By die hospitaal is hy met ‘n infeksie in sy long gediagnoseer en hy is steeds in die hospitaal.

“Hy stuur gereeld vir my foto’s, en in die mees onlangse een kan jy sien is hy net vel en been. Hy het aan my genoem dat hy dink die kanker is in sy longe. Hy het baie pyn en ek is bekommerd oor hom. Hy kan nie alleen vir homself sorg nie.”

Marie sit egter nie agteroor en wag vir hulp nie, en het reeds planne begin maak.

“Ek het met ‘n vervoermaatskappy gereël om, sou hulle met ‘n leë trok vanaf Gqeberha af ry, of dalk plek het vir sy besittings, dit vir my na Polokwane sal bring.  Hulle het ongelukkig laat weet hulle kan nie help nie.  Nou begin ek van voor af planne maak. Ek sal my tyd so moet uitwerk sodat ek kan afvlieg en hom gaan haal, terugvlieg tot by O.R. Tambo en dan betyds wees vir die bussie na Polokwane. Dit is net te ver om te ry en sy liggaam sal dit nie kan hanteer nie. Dit is egter hier waar ons uitdagings inkom. Ek kry net ‘n Sassa-toelaag en het dit nie finansieel breed om so ver te reis nie.”

Marie sê sy en Buks het ‘n reëling dat hy elke oggend vir haar ‘n boodskap moet stuur.

“Ek is nie die tipe mens wat geld vra nie, maar ek het dit nou nodig om vir Buks huis toe te bring. Ek lê snags wakker en maak planne om hom te help.”

Marie het ‘n rekening oopgemaak vir skenkings:

• Rekeningnaam: Emergency
• Rekeningnommer: 1704184477.
• Bank: Capitec.