Back a Buddy-rekening vir Leo (5)

POLOKWANE – Die skoolklok lui en oral dop leerders uit, laggend en opgewonde om hulle ouers te sien. Daar word luidrugtig van maats afskeid geneem.

Leo Smith (5) loop egter stadig in sy pa, Trevor, se rigting, maar Leo se ogies het hul skitter verloor.

Trevor noem dat Leo gereeld vir sy ouers vertel dat hy nie maats het nie.

Hy het wel ‘n ouboet, Caleb (12), met wie hy tuis speel.

Leo is op 12 Oktober 2018 gebore, maar gedurende die swangerskap het sy ma, Tanya, ‘n infeksie opgedoen wat komplikasies veroorsaak het. Dit het veroorsaak dat Leo se gehoor aangetas is.

“As ek reg onthou was hy ‘n jaar-en-‘n-half oud toe hy begin praat het, en ons het later agtergekom hy spreek nie die woorde baie mooi uit nie. Ons het ook agtergekom hy hoor nie altyd as ons met hom praat nie. Hy het wel sy ander mylpale op die regte ouderdomme bereik.”

Leo het vanjaar by Pietersburg Laerskool se gr. R-groep aangesluit en dit is hier waar sy juffrou besef het hy benodig ekstra hulp.

Sy het vir Tanya en Trevor laat weet Leo se spraakvlak moet moontlik ook geëvalueer word.

“Ons het hom na ‘n spraak- en arbeidsterapeut geneem en dié het aanbeveel om hom na ‘n oudioloog te neem. Die oudioloog het vir ons gesê daar is ‘n matige gehoorverlies en ons aanbeveel om verdere toetse te laat doen sodat hulle kan bepaal watter gehoorstukkies gepas sal wees vir hom.”

Die knelpunte is Leo se uitspraak van woorde, sy fynmotories- en perspektiewe ontwikkeling en sy ouditiewe prossessering.

Die gesin is wel lede van ‘n mediese fonds, maar slegs ‘n gedeelte van die onkoste word gedek.

Die gesin benodig nog R80 000 vir verdere toetse, die gehoorstukkies en terapie.

Tanya werk voltyds en Trevor koop en verkoop items aan. Ongelukkig is die besigheid stil en kom daar nie soveel geld in soos hulle gehoop het nie.

Tanya het intussen ‘n Backabuddyrekening oopgemaak met die hoop dat mense sal help.

“Ons is gelowige mense en glo God sal altyd ‘n uitweg gee. In Fillippense 4:19: En my God sal ruimskoots in al julle behoeftes voorsien, in ooreenstemming met Sy heerlike rykdom in Christus Jesus. Want ons dien ‘n almagtige God.”

Die skakel vir dié rekening: https://www.backabuddy.co.za/campaign/hearing-for-leo