POLOKWANE – Twee jong ruiters van Hoërskool Pietersburg is onlangs gekies om as deel van die Limpopospan aan die Suid-Afrikaanse jeugkampioenskappe deel te neem.

Jeanrie van der Merwe (16) en Chicago Ferreira (13) het vroeër die maand aan die South African Show Jumping (SASJ) Ranch Grading Show deelgeneem. Hulle is twee van vier ruiters wat Limpopo op 28 Junie tot 4 Julie in Shongweni, KwaZulu-Natal gaan verteenwoordig.

Chicago se perd, Jumping Jack, is 16 jaar oud, maar sy sê hy word ook liefdevol Angel Child genoem.

Jeanrie se eerste perd is ‘n boerperd met die naam Carmen.

“Ek was haar eerste ruiter. Ons het saam geleer hoe om te ry en ry steeds saam.”

Chicago sê trots dit is die tweede keer dat sy gekies is om aan dié kampioenskappe deel te neem. “Ek is baie geërd en dit is ‘n groot voorreg om gekies te word.”

Sy het as deel van die Limpopospan verlede jaar in dieselfde kompetisie tweede geëindig met ‘n podiumplek in die kampioenklas.

In die individueleklas, waarin soms meer as 50 ruiters deelneem, het sy sewende geëindig.

Chicago was slegs nege jaar oud toe sy aan haar eerste kompetisie saam met haar eerste perd, Lady, deelgeneem het. Hulle het by die Fourways Riding Centre kompetisie aangesluit en ‘n derde plek ontvang in die Showing Class.

Jeanrie was agt toe sy en Carmen saam begin ry het. Haar eerste skou was by Revil Stables.

“Om gekies te word vir die Suid-Afrikaanse kampioenskappe is ‘n groot eer en ek is dankbaar daarvoor. Dit was baie harde werk.”

Net soos met kinders is elke perd vir sy ruiter beter as enige ander perd. Chicago sê die feit dat sy altyd vir Jumping Jack kan vertrou, ongeag die situasie, laat haar veilig voel.

Jeanrie gaan nie saam met Carmen deelneem nie, maar is bevoorreg genoeg om vir Circular van Melinda Kannemeyer te leen vir die kompetisie.

“Hy is ‘n regte liefie en ‘n gentle giant wat my hart gesteel het. Hy spring fantasies.”

Die gevoel wat jy vroegoggend by ‘n skou ervaar, en adrenalien wanneer jy meeding, is wat hulle die meeste onthou.

Jeanrie se passie vir die sport het haar aan die begin deur moeilike tye op haar perd se rug gedra en sy sê sy het nooit verwag om so ver in die sport te vorder nie.

“Ek het heelwat trotse oomblikke, soos verlede jaar by die SA’s toe ek sewende gekom het. Dan was daar die oomblik toe ek die championship-kompetisie by Die Ranch Equestrian Skou gewen het. Dit was my eerste SASJ-kompetisie en ek was net 12 jaar oud. Dit was sekerlik een van my grootste uitdagings aangesien my afrigter haar been ‘n dag voor die kompetisie gebreek het en ek, namens haar, op haar perd ook gery het. Ek is gek oor ‘n uitdaging en sal daardie naweek nooit vergeet nie,” sê Chicago.