POLOKWANE – In die winter drink ‘n mens warm sjokolade, vou jouself knus toe in warm komberse en hou Mnr. en Mej. Bibber by Oosskool.

Donderdag, so op die vooraand van die skoolvakansie, het die Mnr. en Mej. Bibber-finaliste die res van die skool heerlik vermaak.

Die finaliste vir hierdie kompetisie is in gr. 5 en daar word twee deelnemers uit elke klas gekies om die verhoog te betree.

Hierdie jaar se finaliste was Zihan Wiggel, Ashely Sibley, Wiegardt du Toit, Jenna Kruger, Micah Kellerman, Jana Smit, Welrich Christou, Mika Bekker, Jordan Grobler, Mikayla Jacobs, Kyle Fallard en Kallista Krog.

Die beoordelaars het elke deelnemer op hulle informele loop, dans, antwoord op die vraag en die algehele indruk wat hulle gemaak het, beoordeel.

Met ‘n verhoog waar sneeumanne in die sneeu speel het Mika en Welrich gepas aangetrek in silwer en wollerige wit mussies.

Dié twee het die beoordelaars so beïndruk met hulle danspassies en skerp antwoorde op die vrae, dat hulle nie anders kon as om die krone aan hulle toe te ken nie.