POLOKWANE – In elke stad en in elke skool is ‘n Jo of Willem – ‘n seun wat gedurig moeilikheid maak, ‘n aandagsoeker, ‘n rebelse, stukkende, seer seun met geen voorbeeld oor hoe om deur die lewe te gaan nie.

Die bekende sanger Jo Black en sy broer Willem Engelbrecht, was self twee seuns wat hierdie tipe leiding nodig gehad het in hul grootwordjare.

Later, na ‘n reeks verkeerde keuses, het een persoon egter in hulle lewens ingekom wat die wêreld vir hulle verander het.

Die broers het uiteindelik ‘n organisasie sonder winsbejag, BTG Everyday Heroes gestig, wat fokus op die sosiale ontwikkeling en opheffing van die jeug. Hulle streef daarna om kinders van alle vlakke uit die samelewing te bereik en te help om hul volle potensiaal te bereik en uit te leef om sodoende waardevolle lede en bydraers tot hul gemeenskappe te word.

“Vandag poog ons om die jeug van Suid-Afrika op ‘n beïnvloedbare ouderdom reeds te ontmoet en te leer, daar is hoop, en om hulle aan alternatiewe maniere van dinge benader bloot te stel,” vertel Jo.

Willem voeg by hulle herinner seuns aan wie hulle eintlik is.

“Ons hoop om deur die motiveringspraatjies en ingrypingskampe ons harte deur middel van verwante stories, lewenservarings, teleurstellings en die lesse wat ons geleer het, met die seuns te deel.”

Jo sê hulle hoofdoel is om positiewe kernwaardes te vestig, “om leerders aan te moedig om mekaar nie slegs met respek en integriteit te behandel nie, maar om ook ‘n gevoel van eiewaarde te omhels, om hulle te leer om daardie ou te wees of daardie meisie te wees. Basies, om ‘n alledaagse held te wees.”

Hulle praatjies is motiverend van aard en daar word gepoog om sosiale euwels soos afknouery, selfbesering en geweld aan te spreek, en om negatiewe gedrag uit te roei.

Jo en Willem kuier op 1 Augustus in Polokwane by Bolivia Lodge vir ‘n Be That Guy manneaand.

Die vertoning begin om 18:30 en kaartjies kos R4 500 vir ‘n tafel van 10 mans. Dit sluit ‘n ete in en daar is ‘n kontantkroeg.

Vir meer inligting, kontak Dian Venter by 079 858 7725, Ricardo Patricio by 083 320 7744 of Benhardt Gouws by 060 797 9816.