POLOKWANE – Wanneer ‘n mens die ouderdom van 76 jaar bereik het, is jy waarskynlik nie meer lus om jouself oor alledaagse dinge te bekommer nie. Jy is veronderstel om jou dae rustig in jou tuin of met ‘n goeie boek deur te bring.

Vir Oom Thys de Beer, is dit ongelukkig nie die geval nie.

Kort-kort, terwyl ons gesels, vertrek sy gesig van die pyn en soms sal hy selfs sê hoe seer hy het.

Oom Thys het in Polokwane grootgeword, waar hy sy hele lewe lank al woon.

Hy het sy vakleerlingskap by die Spoorweg voltooi en later van tyd op die myne gaan werk, vertel hy.

Tot en met die tyd dat hy siek geword het, het hy tydelik by ‘n vulstasie gewerk.

“Ek is reeds ‘n paar keer met verskillende soorte kanker gediagnoseer, maar was reeds in remissie. Onlangs het ‘n biopsie egter positief vir kanker gewys nadat ek by die uroloog was.”

Hy is na die Pietersburg Provinsiale Hospitaal verwys, waar ‘n dokter my moes sien.

“Na ‘n paar weke wat ek tevergeefs gewag het, het ek myself ontslaan. Ek het die versorging self aangepak, maar dit het net erger geword.”

Vir private mediese sorg gaan dit ten minste R60 000 kos, sê Oom Thys.

“Ek het uitgereik na ‘n oggendradioprogram vir hulp, maar bly maar aan hoop om iets te hoor. Ek is ‘n gelowige man en wag vir God om in te tree. Die pyn is egter ondraaglik. Ek kan nie meer netjies aantrek nie, ek dra net sweetpakbroeke, want dit is net gemakliker. Ek kan nie meer normaal funksioneer nie.”

Oom Thys ontvang slegs ‘n maatskaplike toelaag, en woon by Ons Tuiste.

Hy is vervreem van sy kinders en sê hy is heeltemal op sy eie.

Tot begin van die jaar het hy houtkruise gemaak en verkoop, maar dit het ook nou tot ‘n einde gekom.

Oor sy toekoms is Oom Thys baie onseker.

“Daar kan nou niks gedoen word voordat ek nie daai geld ingesamel het nie. Ek sal seker bestraling en chemoterapie ook moet ontvang.”

As jy kan help, hier is die bankbesonderhede:

Rekeningnaam: MJ de Beer.
Bank: Capitec
Rekeningnommer: 1431065135.

Om nader betrokke te raak, stuur ‘n e-pos na maretha@nmgroup.co.za.