POLOKWANE – Grondslagfaseleerders van Oosskool het verlede week revue gehou en die gehore behoorlik bederf met Afrikaanse treffers soos Braaf soos ‘n Boerboel, Toer om die Vloer en Liefdegenerasie.

Die optredes is afgeskop met die dansgroep wat op ‘Afrikaners is Plesierig’ dans en net daarna was Lia en Mieke van der Walt Vinkel en Koljander met hulle dialoog.

Die dansgroep het aan die gehoor gewys hoe die Afrikaner maak as Bernice West en Bok van Blerk sing, ‘Die Afrikaner Maak So’.

Nadat Jayden Gouws en Anrich du Toit hulle kans op die verhoog in ‘n samespraak gehad het, het die gr. 2‘s die revue amptelik oopgestel vir die klasse om te dans.

Kettie (PW Griesel) en Klip (RJ Odendaal) het Klip se Afrikaanspunte deur middel van idiome bespreek en die vier Jêmbekkies het ook hulle sê op die verhoog gesê.

Die personeel het die gehoor laat skater met hulle optrede van ‘Op die trein na Pretoria’, waar hulle ‘n jonger groep onderwysers ontmoet wat hulle touwys gemaak het oor hoe om in hulle taal te dans.

Na maande se oefening en bykans ‘n week se optrede, kan leerders en onderwysers terugkyk op ‘n baie suksesvolle revue.