Mokopane maak hande en beursies oop vir Dezi
Bosveld het voorheen berig dat die liefdevolle 10-jarige meisie, wat reeds sedert 2022 aan nierversaking ly, tans 12 ure per dag dialise ontvang terwyl daar gewag word vir die uitslae.
MOKOPANE – Dezaray van Huyssteen, beter bekend as Dezi, en haar ouers, Basie en Makkie stap daagliks ‘n moeilike pad om die mediese en finansiële uitdagings te hanteer.
Bosveld het voorheen berig dat die liefdevolle 10-jarige meisie, wat reeds sedert 2022 aan nierversaking ly, tans 12 ure per dag dialise ontvang terwyl daar gewag word vir die uitslae.
Lees ook: Dezi (9) het Mokopane se hulp nodig
Kristalle is gediagnoseer op Dezi se niere en as die probleem geneties is mag ‘n geskikte skenker nie direk uit haar familie kom nie.
Daar is ook ‘n vermoede dat Dezi aan ‘n seldsame siekte ly en dit moontlik die rede is dat dokters van haar bloed na die VS wil stuur vir toetse.
Dezi se toestand behels gereelde hospitaalverblyf, mediese behandeling ook die aanskaf van duur medikasie en ‘n streng eetplan en ‘n radikale bedrag is nodig vir toekomstige uitgawes.
Jakaranda FM se Good Morning Angels-program het onlangs te hore gekom van Dezi se uitdagings en haar ouers gekontak.
Lees ook: Mokopane maak harte oop vir moedige Dezi
Basie het aan omroeper Martin Bester vertel dat hulle wel aan ‘n mediese fonds behoort, maar dat alle koste nie gedek word nie. Dezi is ook op ‘n spesiale eetplan.
Hy het ook bevestig dat indien die probleem geneties is, daar wel behanding is, sou die toetse positief terugkom, maar dat hierdie behandeling baie duur is.
Die ander opsie is dat haar naam op ‘n waglys geplaas word vir ‘n geskikte skenker.
Martin het die wonderlike nuus met die gesin gedeel dat Anglo American Platinum Mogalakwena Mine jaarliks die Bushveld Classic Gholfdag Saterdag aangebied het, juis om fondse in te samel wat teruggeploeg word in die gemeenskap, en vanjaar het die myn besluit om aan Dezi R100 000 te skenk om die gesin by te staan.
Daar is ook ‘n teddiebeer opgeveil vir R45 000 vir die doel.
‘n Baie emosionele Basie en Makkie het nie woorde gehad nie.
“Ons kan nie genoeg dankie sê nie, nie net vir die skenking van die myn nie maar ook aan die wonderlike mense in die dorp wat net hande gevat het en bly help om geld bymekaar te kry.”
