MOKOPANE – Verlede jaar het die dorp se inwoners met groot opgewondenheid gewag vir dr. André Hattingh van Pediatric Care Africa om die dorp op ‘n trekker binne te ry na sy groot missie.

Die goeie nuus is dat dr. André op 20 Februarie weer hierlangs gaan verbykom, maar vanjaar ry hy en sy span op motorfietse.

Polokwane Observer het voorheen berig dat André in 1994 gekwalifiseer het as ‘n neurochirurg en het hy ‘n draai in Rwanda gaan maak in die tyd van die volksmoorde.

Lees ook: ‘Vir die kinders’ – dr. Hattingh stop in Mokopane

Dit was vir hom ‘n bitter pil om te sluk, toe hy opgemerk het dat daar niemand was wat aandag en hulp aan die kinders verleen het nie.

“Dit het my hart diep getref. Daar was ongeveer 36 000 kinders doodgemaak in daardie tyd.”

Hy het bygevoeg dat, vir elke kind wat doodgemaak is, daar sowat sewe ernstig beseer was. Hy het net daar die belofte afgelê om eendag – sou dit hom beskore wees – kinders te help.

“Dis waar die gedagte van Pediatric Care Afrika ontstaan het. Deur my loopbaan het ek geleer wat die beste manier is om ‘n nie-regeringsinstansie te bedryf, en in 2016 het ek die leisels oorgegee en voltyds, met my vrou se ondersteuning, my fokus geplaas op die behandeling van kinders. Omdat Pediatric Care Africa ‘n nie-winsgewende organisasie is doen die span allerhande fondsinsamelingsveldtogte. Die motorfietsrit gaan ingespan word vir kinders wat duur operasies moet ondergaan, om mense bewus te maak van die hoeveelheid kinders wat jaarliks vermoor word in Suid-Afrika en dan ook om die buiteland se fokus te plaas op plaasmoorde.”

Tydens verlede jaar se trekkerrit het die ontvangs langs die pad dr. André aangespoor om die kilometers met oorgawe aan te pak.

“Mense waai vir jou, ander druk toeter en gee pad dat jy kan verbykom. Dit laat ‘n mens se hart so lekker voel en dit is ‘n ongelooflike aansporing.”

Hy vra dat die dokters in Mokopane hande vat en help om van die projek ‘n sukses te maak, en hy nooi ook die motorfietsryers uit om saam met hom te ry. Indien daar enige donasies is, sal dit welkom wees.

Vir navrae, kontak vir Mandy Pieters by 072 034 0544.