POLOKWANE – Kiara van Dyk (12) is ‘n leerder by Akademie Reformia en een van die vakke wat sy neem, is kuns.

Toe dié klas verlede jaar die opdrag kry om enige gebou van hulle keuse uit herwinbare materiaal te maak, was die Voortrekker Monument haar eerste gedagte.

“Ek is ‘n Afrikaner en ek hou van geskiedenis. Ek geniet Afrikaanse stories en wil meer leer van die kultuur. Dus het ek op die Voortrekker Monument besluit,” vertel sy.

Kiara het haar kunsjuffrou, Jané Dippenaar, se opdrag saam met dit wat sy by haar Afrikaanse juffrou, Lana Roos, geleer het, bymekaar gebring en so het die monument vinnig vorm aangeneem.

Kiara was nog nooit self by die Voortrekker Monument nie en het dié driedimensionele gebou met die hulp van foto’s gebou.

Sy sê haar ma, Martina, het net gehelp deur gate met ‘n skerp lem in te sny, maar die res het sy self gedoen.

“Ek het die Vrydagmiddag begin om die koerantpapier op te rol en Saterdagmiddag het ek alles begin plak. Ek het amper nie klaar gekry nie. Gelukkig was daar genoeg tyd om die projek te verf voordat ek dit moes inhandig.”

Kiara sê hulle gesin het op 16 Desember na die monument gegaan en sy het die uitstappie baie geniet.

Haar maats het dieselfde opdrag gekry en het onder andere ‘n malvalekker igloe, wensfontein met liggies, watertenkstaander, polisiestasie, ligtoring en ‘n boesmanhuis kompleet met diere, gemaak.

Sy sê sy bêre die meeste van haar projekte, “maar soms breek dit en dan moet ek dit weggooi”.