MOKOPANE – Die Heritage Protection Group (HPG), die veediefstaleenheid en die polisie het steeds hul hande vol met die slagting van vee.

Veral beesslagtings het onlangs weer in die Helderfonteinomgewing buite Mokopane posgevat.

“Een bees is in die kraal geslag, waarna die verdagtes die vleis net daar opgesny het,” het Hendrik Hattingh van HPG verduidelik. Die oorblywende ingewande en dele van die vet is ‘n ent daarvandaan in erdvarkgate gegooi en die maaginhoud is gestrooi in die kraal en met grond bedek.”

Daar is ook bewyse gekry dat die vleis op kruiwaens gelaai is en na die naaste nedersetting gestoot is, het hy gesê.

“Die verdagtes het takke afgebreek en hul spore toegevee, maar dié is later weer gevind deur bloedspatsels wat op die gras opgemerk is. Dit is gevolg tot by ‘n spruit waar hulle die vleis en kruiwaens op ‘n donkiekar gelaai het om vermoedelik verder na die nedersetting te vervoer.”

Volgens Hattingh het die groep die spore gevolg tot by ‘n huis waar daar dele van die vleis gevind is.

“Monsters is daar geneem vir DNS-toetse. Die polisie sal die saak verder ondersoek.”