POLOKWANE – Gr. R-leerders en hulle jonger vriende sien dikwels uit na pouse, nie soseer om te speel nie, maar om te sien wat Mamma alles in die kosblik gepak het.

Kraakvars broodjies met ham en kaas, vrugtelekkers, dalk biltong en droëwors, afgerond met vrugtesap. Dikwels is die snoepiery die eerste stop vir pouse om daar lekker pizza of warm slaptjips te koop.

Ongelukkig is hierdie senarios nie vir almal beskore nie.

Sommige leerders gaan haal ‘n kospakkie, met heerlike, gesonde happies in, by die kantoor, en nog ander, maak ‘n verskoning op soos dat hulle hulle kosblik by die huis vergeet het, net sodat hulle maats nie moet weet dat hulle eintlik nie ‘n kosblik het nie.

By Helpende Hand word daar tans 8 000 kinders daagliks gevoed met die #StopHonger en Kosblikkie-projek.

Dié is daarop gemik om te sorg dat kleuters elke dag een voedsame bord kos ontvang.

“Die hooffokus van die projek is om behoeftige kleuterskole te ondersteun met die voeding van kleuters. Danksy die voedingsprojek word die kleuters as fisiek sterker bestempel. Hulle groot- en kleinmotoriese vaardighede asook hulle intellektuele en emosionele ontwikkeling baat by die voedsame maaltyd. Dit beteken dat hulle gehoorsamer is, hulle take makliker kan verrig en dat hulle selfvertroue verbeter,” sê Carol Ankiewicz, maatskaplike werker by Solidariteit Helpende Hand Limpopo Streek.

Helpende Hand ontvang ook versoeke om kinderhuise, ouetehuise en behoeftige gesinne te help en daarom is bykomende veldtogte soos #StopHonger en #HelpJag begin om die Kosblikkieprojek aan te vul.

“Elke maaltyd wat aan ‘n behoeftige kleuter gegee word, is ‘n vriendelike gebaar wat die krag het om lewens te verander en die toekoms van ons land te vorm. Deur by te dra tot voedsame kos vir behoeftige kleuters, dra ons bord vir bord by tot ‘n hoopvoller samelewing.”

Daar is twee maniere om te help. Lesers kan ‘n finansiële bydrae maak of ‘n kosblikke pak en voorsien.

Besoek https://helpendehand.co.za/kosblikkie/ vir aanwysings oor wat in die kosblik gepak kan word.